2 Corinthians 12
Mii Loxo Aipiepiena Xe Palapala'anixu Palanga Noxou Paulo
1Eni aitileli, mo loxo mii vile uxali uasi ne, ia eni asuku alai no anu mii loxo aipiepiena 'o mo palapala'anixu palanga molu noxou Tila Lataua. 2Eni elavusou mitema vile noxou Kalisito ane tauu lele'e mavulovexa mo mulu'e no lia tami'a mulai mukalu 'o la Uleenu Lataua mutelaixu no anu opo loxotolo tatalusou. Male loxovaa no anu vasimolu, xe uasi la no anu uleenu, eni alavusou uasi Latauasi mulavusou. 3Male loxovaa no anu vasimolu, xe uasi la no anu uleenu, eni alavusou uasi Latauasi mulavusou. 4Mutelai no anu tuala laixe noxou Lataua la anu mulomusou mimii ane umomomo sou mitema vile molu no anu vaikalau uasi. Mimii ane ne tavuna sou mitema ua'aloxu. 5Eni amasaxa sou aitinu mitema ane loxo ne, ia amasaxa sou a'itileli la uasi. Eni a'itileli ne loxo sou mamalaxo nesi. 6Mo lexe eni amasaxa sou a'itileli la, eni ne loxo itema ane u'oxo vuluvulusi uasi, xo loxo eni ne avivikala no anu vaikala maninasi. Ia eni a'oxonu a'itileli loxo ne uasi mo sou itema vile uxavutala u'oki noxilo uaulixu malemalei mo lolomu noxilo mamu.7 aSou loxo uutulululeli mo sou mamu sou eni melo a'osasilo u'oki la sou xaixai tatila sou palanga ane eni emamaisou upala'a 'o. La sou Lataua mumalanixu mii anaanaxu 'o ne no nano no 'a xiasileli ne sou ulosilo navunavu. Mii ane ne anu loxo mitemau Satani sou u'oxo masualeli. 8Alaxu tatalu la eni elinga noxou Tila sou lexe uxexeenu sou uxexesilo. 9 bIa Anu muvikala mulu'e noxilo aloxo, “Alauna noxilo ne anu umomomosine ukalusi, xo xavi noxilo ne anu uxali lololi no mine nini mamalaxene.” Aloxo ne la sou eni a'itileli mo a'osa no 'a mamalaxo noxilo ne. La sou ane'i ilavusou lexe xavi noxou Kalisito a uxolu noxilo. 10Anu tava'u aloxo ne, la sou loxo noxou Kalisito la eni a'osa manina no anu mamalaxosi ne mo no nano no anu vaikala sou italoxolixo ne mo no nano no anu ialuialuxu ne mo i'oxo masualeli mo no anu tu'umaxu. Xo no mine eni mamalaxosi ne la eni axali peki'ailo.
Xavutalau Paulosi'a ta Kolinito
11 cEni e'oxoleli exali loxo mitema vile e e'oxo vuluvulusi, ia ngingisi ane ngeulaxuleli sou nge'oxoleli loxo ne. Eni ne lexe ngingi nga'itinu ualasilo, xo eni ne loxo a kitu'a sevile no laaxa'a ta aposeli ia eni axolu no laaxa'a ta aposeli tei ne uasi. Ia uasi eni amitema vitanisi. 12 dMimii ane mumaxa'u mitema sou xaixai noxou ne aloxo sosovo iouiou xe mii ane tanenge liliou la mii ane xaviinu mo ane muxali nonixingengi ne no anu 'ilixo sou etavule tu'utu'umaxu mu'oki. 13 eEni a'oxongengi 'ilixo vile mo noxi'a ta temanu lalolalotu va'ava'axu uasi. Ia mii ane 'osi, lexe eni ne alosinge tu'umaxu uasi. Ngaxiu tumalingeu susu noxilo ane ne.14Eni a elalaxii sou axixaosinge sou iave tatalusou mo eni amomomo sou alosinge tu'umaxu uasi. Xo mii ane eni emasaxau ne anu a mimemimengi ne uasi, ia ngingi nesi xo anu aloxo ta 'ili'a ne umomomo ixaxai sou isu'uline'i ta mami'a ilo'a ta neni'a uasi, ia ta mami'a ilo'a ta neni'a ane ixaxai sou isu'uline'i ta 'ili'a. 15Aloxo ne la sou eni ne a'osa manina sou apaipalunu mimii ukalusi noxilo ne singe no 'a uleengengi mo apaipalunu maulixo. Ia lexe eni amasaxainge u'oki, la loxovaa ngingi ngamasaxailo sevile kitu'a? 16Lexe ngingi aloxo ne, la eni ne alosinge tu'umaxu uasi. Mo eni loxo mitema sou kalakalavoi sou ano'u lamoli uasi. Ia mose'i noxinge ne mi'oxo lexe eni amitema aloxo ne. 17Loxovaa eni ekalusou mimemimengi noxi'a ta mitema ane epalusi'a milai noxinge ne? 18 fEni etali'isou Tito sou ulai noxinge mo epalusou vivinge vile a sou ilou Tito ilai ne ukalavoi sou ukalusou mimemimengi uasi, loxovaa, anu mukalusou? Loxovaa nexi noxou taxaxai no anu xavutala iouvilesisi mo tamulinu vote'i iouvilesisi uasi?
19Loxovaa ngingi ngexavuxavutala lexe nexi ta'oxo latolosixe ulai noxinge? Nexi ne tevivikala no iou Lataua aloxo ane'i ane noxou Kalisito, mo ta vivixe e tamasaxainge manina, mimii ukalusi ane nexi te'oxonu ne, anu sou u'oxongengi ngatulu peki'ainge. 20Xo eni a'ume lexe no mine eni ane'e la umomomo sou axalisinge loxo eni emasaxainge lexe ngingi ngaxali aloxo ne uasi. Mo umomomo sou ngingi ngaxalisilo loxo ngingi ngemasaxailo lexe axali aloxo ne uasi. Eni a'ume sou 'oto'oto mo sangalako mo opo la'ila'iaxa'a xe matea sou mii mo vaikala sou taloxolixa'a ta mitema xe munumunu mo totopaxa xe xovulaulau male a uxolu noxinge ne. 21 gEni a'ume lexe no mine eni ane'e la, la Lataua noxilo ulu'eleli no laxungengi. La eni atamasi'a ta piena ane'i ane misusu tei io ixiu tumali'a no 'a 'ilixo nuninuni'u ne uasi xe 'ilixo sou vote'i xe masaxa masumasua ane ane'i mi'oxonu ne.
Copyright information for
ATA